وقت اشاعت :Thursday,24 April 2008, 14:27 GMT 19:27  PST

پاکستان اور افغانستان کی سرحد پر جھڑپ ، متعدد افراد ہلاک ہو گئے
 

پورٹ : بی بی سی ون ڈاٹ نیٹ کنڑ

پاکستانی دستے، افغان فوج اور طالبان شدت پسندوں کے درمیان ہونے والی ایک سہ طرفہ جھڑپ میں متعدد افراد ہلاک ہوگئے ہیں۔ طالبان تنظیم کے ایک ترجمان نے دعویٰ کیا ہے کہ جھڑپ اس وقت شروع ہوئی جب اس کے افراد نے ایک افغان فوجی چوکی پر حملہ کیا۔ افغان صوبے کنڑ میں پولیس کے سربراہ عبدالجلال جلال کا کہنا ہے کہ اس جھڑپ میں پانچ افغان پولیس اہلکار ہلاک ہوئے ہیں۔ پاکستان حکام کا کہنا ہے کہ اس کا ایک فوجی اس وقت ہلاک ہوا جب افغانستان کی طرف سے اس کی فوجی چوکی پر فائرنگ کی گئی۔ پاک فوج کے ترجمان میجر جنرل اطہر عباس کے مطابق لڑائی اس وقت شروع ہوئی جب طالبان جنگجوؤں نے ایک افغان سرحدی چوکی پر حملہ کیا۔ ترجمان کے مطابق جوابی فائرنگ میں ایک پاکستانی چوکی بھی افغان فوج کی فائرنگ کی زد میں آ گئی جس سے ایک پاکستان فوجی ہلاک اور ایک زخمی ہو گیا۔ دونوں جانب سے یہ بھی دعویٰ کیا گیا کہ اس جھڑپ میں آٹھ طالبان جنگجو بھی ہلاک ہوئے۔